Saturday, July 31, 2010

ကော်ဖီထဲက ကြမ္မာ


မီလန်ကာ ကော်ဖီကို အခုကြိုက်နေသည်။ ငယ်ငယ်တုန်းကတော့မကြိုက်မိခဲ့၊ နွားနို့မှာ ပြောင်းဖူးမှုန့်တွေထည့်ထည့်ပြီး သောက်ခဲ့သည်။  ဟိုး ငယ်ငယ်တုန်းက ... မီလန်ကာ့ အဖွားသောက်တာမြင်ဖူးနေကြ၊ မြည်းနေကြဆိုတော့ အဖွားကိုချစ်တဲ့မီလန်ကာလဲ ပြောင်းဖူးမှုန့်လေးတွေထည့်ထားတဲ့ နွားနို့က အရသာရှိသည်ဟု ငယ်ငယ်က ထင်ခဲ့မိသည်။ အဖွားကတော့ “အစာအိမ်နာအတွက်သောက်တာ အရသာသိပ်မရှိလှပါဘူးကွယ်” လို့ ခဏခဏ ညည်းပြလေ့ရှိသည်၊ အဖွားက ဒီလို ညည်းနေပေမဲ့လဲ ပြောင်းဖူးမှုန့်တွေ ထည့်ထားတဲ့နွားနို့တစ်ခွက်ကိုပဲ မနက်တိုင်း သောက်နေခဲ့ပါသည်။

မီလန်ကာ အရွယ်ရောက်လာတော့ အရသာအမျိုးမျိုးကိုစမ်းကြည့်ခဲ့သည်။ အတွေ့အကြုံအသစ်တွေလဲ စိတ်ဝင်စားခဲ့ပြီ၊ အဖွားရဲ့ပြောင်းဖူးမှုန့်တဖွေးဖွေး နွားနို့တစ်ခွက်ဟာ အရသာမရှိလှဘူးဆိုတာလဲသိခဲ့ရပြီ။ ကော်ဖီတစ်ခွက်ကို တစ်ကြိုက်စီအရသာခံမြည်းရင်း ကော်ဖီကုန်သွားမဲ့အချိန်ကို နှမြောတတ်ခဲ့ပြီ၊ အရက်ချို အချစ်ခါးလား၊ အချစ်ချို အရက်ခါးလား၊ နှစ်ခုစလုံးမှန်မယ်ထင်တဲ့ ချိုတစ်ခါ ခါးတစ်လှည့်  အချစ်ရဲ့အတွေ့အကြုံတွေလဲ ရခဲ့ပြီ၊  အချစ်ခံခဲ့ရဖူးပြီ၊ ချစ်ခဲ့ဖူးပြီ၊ အသည်းခွဲခဲ့ဖူးပြီ၊ အသည်းကွဲခဲ့ဖူးပြီ၊ ချစ်ခဲ့ဖူးပြီ၊ မုန်းခဲ့ဖူးပြီ၊ အမှတ်တရ လက်ဆောင်နုနုရွရွလေးတွေ (ဥပမာ အသည်းပုံပိစိကွေးလေးတွေနဲ့ ပုံဖော်ထားတဲ့... တကယ်တမ်းအသုံးမ၀င်လှတဲ့ပစ္စည်းလေးတွေ)ကို ရလဲရခဲ့ဖူးပြီ၊ ပေးလဲ ပေးခဲ့ဖူးပြီ၊ အဲဒီနုနုရွရွ အမှတ်တရပစ္စည်းလေးတွေနဲ့အတူ ထုတ်ပိုးထားတဲ့စက္ကူပါးတစ်စပါမကျန် သိမ်းထားခဲ့ဖူးသလို၊ အနည်းငယ်တန်ဖိုးရှိနေတဲ့ပစ္စည်းတွေပါမကျန် အားလုံးကိုလွှင့်ပစ်ခဲ့ဖူးပြီ၊ အပြုံးချိုချိုတွေကို အူလှိုက်သည်းလှိုက် ပြုံးပြတတ်ခဲ့သလို၊ ခပ်မာမာအမုန်းတစ်ခုကိုလဲ အပြုံးတုနဲ့အတူ မြန်မြန်လေးပဲ ထုတ်သုံးတတ်ခဲ့ပြီ၊ ၀မ်းနည်းခဲ့ဖူးပြီ၊ ပျော်ရွှင်ခဲ့ဖူးပြီ၊ ခံစားချက်တွေ အမယ်စုံ မီလန်ကာ ရခဲ့ဖူးပြီထင်ပါသည်။ မီလန်ကာ ဒါတွေကို မခံစားချင်တော့၊ ငြိမ်ငြိမ်လေးပဲနေချင်တော့သည်။ မီလန်ကာ စာရေးမည်။ စာဖတ်မည်။ ဒီဇိုင်းတွေဆွဲမည်။ ပုံတွေဆွဲမည်။ ကိုယ့်ဘာသာ လှလှပပလေးပြင်မည်။ အ၀တ်အစားလှလှ၊ အလှပြင်ပစ္စည်းလှလှလေးတွေ စိတ်ကူးရတိုင်းဝယ်မည်။ မီလန်ကာ သိပ်ချစ်ရတဲ့အဘွားအတွက် ပိုက်ဆံပေးမည်။ ဒါဆိုရင် မီလန်ကာ့ဘ၀ဟာ ပြည့်စုံနေပြီလို့ ကိုယ့်အယူအဆနဲ့ ယုံကြည်နေခဲ့သည်။ မီလန်ကာရဲ့သူငယ်ချင်းမ ဗဲရာကတော့ မီလန်ကာ့အပြောကို သူ့ရဲ့မျက်လုံးလှလှတွေ ပိတ်သွားတဲ့အထိ သဘောကျစွာရယ်မောခဲ့နေခဲ့ပါသည်။ ဗဲရာကပြောသည် “မီလာ ရယ်၊ ယူက ဒါနဲ့ပဲ ယူ့ဘ၀ကိုပြည့်စုံပြီဆိုပြီး အလုံပိတ်အခန်းလေးထဲ ပိတ်ထားတော့မှာတဲ့လား၊ ဒီလို ခံစားချက်တွေက အမြဲရှင်သန်နေတာနော်၊ အမြဲရှင်သန်နေရမှာပဲပေါ့၊ ချစ်လိုက်၊ မုန်းလိုက်၊ မချစ်ရင်မုန်းလိုက်၊ ရွေးစရာတွေမှ အများကြီးပဲလေ၊ ယောက်ျားတွေက နားဆွဲလှလှတွေလိုပဲ၊ နားဆွဲလေးတွေကို သူ့နေရာနဲ့သူဝတ်ရသလိုပေါ့၊ ညနေခင်းလမ်းလျှောက်ထွက်တဲ့အခါ၊ ညဘက် ကော်ဖီဘားကို သွားတဲ့အခါ ရွေးပြီး လိုက်ဖက်မဲ့နားကပ်မျိုး ၀တ်ပေးရတယ်၊ အလှသုံးနားဆွဲလေးတွေက လူကိုပိုပြီးတက်ကြွစေတယ်။ တို့များမိန်းကလေးတွေရဲ့အလှကို ပိုပြီးလန်းဆန်းစေတယ်။ ဒီလိုပဲ ပုလဲနားကပ်၊ စိန်၊ ပတ္တမြား ဒီလို နားကပ်မျိုးကိုလဲ တစ်သက်တာအတွက်တော့ ပိုင်ဆိုင်ရဖို့ကြိုးပမ်းရဦးမှာပဲ” တဲ့၊ ဗဲရာပြောသမျှစကားတွေအားလုံး မီလန်ကာ နားမလည်ခဲ့၊ ရှုပ်ထွေးလွန်းလှသည်။ တစ်ခါတစ်ခါ ဗဲရာကိုယ်တိုင်လည်း နားလည်ဟန်မတူ၊ သူ့မှာရှိနေတဲ့ များပြားလှတဲ့နားကပ်တွေ မရိုးနိုင်အောင် ၀တ်ဆင်ရင်း၊ တချိန်လုံး သူအလုပ်တွေရှုပ်နေခဲ့သည်။
တကယ်တမ်းတော့ ဗဲရာက ချစ်ဖို့ကောင်းလှသည်။ အသားအရည်ဖြူသည်။ ၀င်းသည်၊ စိတ်ဆိုးလွယ်သူ မဟုတ်သလို၊ စိတ်လည်းရှည်သည်၊ သည်းခံတတ်သည်။ အမြဲပြုံးနေတဲ့ ဗဲရာကိုစတွေ့ခါကာစက အပြုံးလှလှလေးကြောင့် ချစ်ဖို့ကောင်းလှသည်ဟု ထင်ခဲ့မိသလို အလုပ်ခွင်မှာအတူတူ ရင်းနှီးလာတဲ့ အချိန်မှာလည်း အကောက်အကွေ့မရှိတဲ့ သဘောဖြူအူစင်းမိန်းကလေး အမျိုးအစားမှန်း သိလာခဲ့ရသည်။ တစ်ခုပဲ ဗဲရာ့နားမှာ နားကပ်ရောင်စုံလေးတွေများလွန်းလှသည်။ ဗဲရာ့အနားမှာ အရွယ်စုံယောက်ျားလေး မိတ်ဆွေတွေ အမြဲရှိနေတတ်သည်။

ဗဲရာအမေက သစ္စာရှိသော(သစ္စာ)လို့ အဓိပ္ပါယ်ရတဲ့ ဗဲရာဆိုတဲ့ အမည် သမီးလေးကိုပေးခဲ့သည်တဲ့ ဗဲရာပြောခဲ့ဖူးသည်။ ဗဲရာကတော့ သစ္စာဆိုတာ သိပ်စိတ်ဝင်စားပုံမရခဲ့၊ သစ္စာရှိဖို့ဆိုတာ သူ သိပ်အလေးအနက်မရှိလှ၊ ဗဲရာကြောင့် ပုံစံမျိုးစုံနဲ့ စစ်ရှုံးခဲ့ဖူးတဲ့ယောက်ျားလေးတွေ မီလန်ကာတွေ့ခဲ့ရဖူးသည်။ မီလန်ကာ တစ်ခါတော့ပြောဖူးသည်။ ဒီလိုမလုပ်ဖို့၊ ဗဲရာကတော့ ခွက်ထိုးခွက်လန်ကိုရယ်မောနေခဲ့သည်။

ဗဲရာကပြောသည်
“သူတို့က သနားစရာမကောင်းလှပါဘူး၊ သူတို့လိုတာလဲ သစ္စာမဟုတ်ဘူးလေ မီလာရဲ့၊ ဗဲရာ သူတို့ကို ဘာမှမလုပ်ပါဘူး၊ ဗဲရာ့ကိုလည်း သူတို့ဘာမှ လုပ်လို့မရဘူး၊ ဗဲရာ တစ်နေ့အိမ်ထောင်ပြုမှာပါ၊ ဗဲရာကလေးတွေလဲ အများကြီးမွေးဦးမှာပဲ၊ ဗဲရာလက်ထပ်မယ့်သူက စိန်နားကပ်လို ယောက်ျားမျိုးလေ၊ ဗဲရာ ပိုက်ဆံရှာဖို့ မကျွမ်းကျင်ဖူး မီလာရဲ့၊ ပိုက်ဆံပဲသုံးတတ်တာ၊ ဗဲရာ ဘာမှပေါက်ကရမလုပ်ပါဘူး၊ မီလာ မစိုးရိမ်နဲ့ သိလား၊ မီလာကလေ မီလန်ကာဆိုတဲ့နာမည်နဲ့ လိုက်အောင် ချစ်စရာကောင်းတယ်၊ တစ်ခါတစ်ခါ မီလာက အရာအားလုံးသိနေတဲ့ အမေလို၊ အမလို တစ်ခါတစ်လေလည်း ဘာမှနားမလည်တတ်သေးတဲ့ ညီမငယ်လေးလိုပဲ၊ ဒါကြောင့် မီလာ့ကို ဗဲရာ သဘောကျတာ”
တဲ့၊

ဗဲရာ က သူ့အကြောင်းပြောပြရင်း ပြောပြရင်းနဲ့ နောက်ဆုံးတော့ မီလန်ကာကိုပဲ တခုတ်တရချီးမွမ်းတော့သည်။ ဟုတ်တော့လည်းဟုတ်သည်။ ဗဲရာဘေးမှာ ယောင်္ကျားလေးတွေ အများကြီးရှိနေခဲ့ပေမဲ့ ဗဲရာ အလည်မလွန်ခဲ့ပါ၊ ကော်ဖီသောက်မည်။ မုန့်ဆိုင်သွားမည်။ ဒီလောက်ပဲ၊ ရုပ်ရှင်အတူသွားကြည့်ကြတာမျိုးတောင် ဗဲရာ အရှုပ်မခံခဲ့၊ နားကပ်လေးတွေတော့ အများကြီးပဲ ရွေးရွေးပြီးတပ်သည်။ နားကပ်လေးတွေကို အမြဲတမ်းပဲ ရွေးနေခဲ့သည်၊ ဒီလိုဆိုတော့လည်း ဗဲရာကို မီလန်ကာစိတ်ချထားလိုက်သည်။ ဗဲရာက သူ့ဘာသာ ကောင်းကောင်းမွန်မွန်ထိန်းကျောင်းနိုင်သည့် မိန်းကလေးဖြစ်ပါသည်။

ဗဲရာကို မီလန်ကာ စိတ်ချထားပေမဲ့ ဗဲရာကတော့ မီလန်ကာကို တစ်စက်ကလေးမှ စိတ်မချခဲ့၊ သူ့ရဲ့ မအားမလပ်နိုင်တဲ့အချိန်တွေ ကြားထဲက မီလန်ကာအတွက် အချိန်ကို အမြဲဖဲ့ချန်ထားလေ့ရှိသည်။ အလှအပကြိုက်တာချင်းတူသူမို့ ဈေးဝယ်ထွက်ကြမည်ဆို ဗဲရာရဲ့ တခြားအစီအစဉ်တွေ အားလုံးကိုခပ်ဝေးဝေးလွှင့်ပစ်တတ်သည်။ ဗဲရာရေ...လို့ ဆိုတာနဲ့ ဗဲရာ ပိုက်ဆံအိတ်လေး ကောက်ကိုင်ပြီးသား ဂျီအမ်အလစ်မှာ မီလန်ကာတို့ ကုမ္ပဏီအနားးက ရှော့ပင်းစင်တာကို သွားကြဖို့ အသင့်ရှိနေတတ်မြဲ၊ ငြိမ်ငြိမ်ကုတ်ကုတ်နေတတ်လွန်းလို့ မီလန်ကာကို ဗဲရာက စိတ်မချ၊ တစ်သက်လုံး ငြိမ်သက်သွားတော့မှာကို သူအမြဲစိုးရိမ်နေခဲ့သည်။ မီလန်ကာ အလှတွေပြင်ရင် သူကြိုက်သည်၊ ဟိုဟိုဒီဒီ သွားမယ် ခေါ်ရင် သူ လိုက်မည်၊ အမြဲအသင့်ရှိတတ်သည်။

မီလန်ကာနဲ့ ဗဲရာက ကုမ္ပဏီတစ်ခုတည်းမှာ အလုပ်လုပ်ကြပေမဲ့ ဌာနချင်းတော့မတူ၊ ဗဲရာက ဂျီအမ်ရဲ့ အထွေထွေအတွင်းရေးမှူး၊ အက်ဒမင်(admin) ဌာနက၊ မီလန်ကာက web development ဌာနက ဒီဇိုင်နာ၊ မီလန်ကာ က ကွန်ပျူတာရှေ့ မခွာ၊ အလုပ်တွေကလည်း မများတဲ့နေ့ဆိုရင်တောင် အင်တာနက်မှာ မီလန်ကာရေးချင်တဲ့အကြောင်းတွေ လိုက်ဖွ၊ ရှာပြီးဖတ်၊ အလုပ်အတွက် လိုအပ်မယ့် ကျူတိုရီယယ်ဖိုင်တွေ ဟိုဟိုဒီဒီလိုက်ရှာတာနဲ့ပဲ မအားနိုင်ခဲ့၊ ဗဲရာကတော့ မရ၊ အချိန်သိပ်တိကျသည်။ ကော်ဖီသောက်ချိန် ၂နာရီ ခွဲ ၃နာရီလောက်ဆိုရင် သူလှုပ်လှုပ်ရှားရှားဖြစ်လာပြီ၊ တစ်ခါတစ်ရံ ကော်ဖီကို ရုံးမှာပဲ သောက်ကြသည်။ တစ်ခါတစ်ရံတော့လဲ မီလန်ကာတို့ ကုမ္ပဏီအောက်ထပ်က ကော်ဖီဆိုင်လေးမှာ သွားထိုင်ကြသည်။ ကော်ဖီသောက်ရင်း စကားတွေပြောကြသည်။ တခြားသူငယ်ချင်းတွေလဲ ပါတဲ့အခါ ပါသည်။ အားလုံး စကားတွေ ၀ိုင်းဖွဲ့ပြောကြတာ တော်တော်ပျော်ဖို့ကောင်းသည်။ တစ်ခါ နှစ်ခါမဟုတ် ရုံးကခွင့်ပြုတဲ့ ကော်ဖီသောက်ချိန်ထက် ပိုယူကြတဲ့ နေ့တွေ အများကြီးရှိခဲ့သည်။


မီလန်ကာရဲ့အချစ်တွေ... မီလန်ကာ အမည်က ချစ်လှစွာသော ချစ်စရာကောင်းသောလို့ အဓိပ္ပါယ်ရတယ်တဲ့၊ မီလန်ကာ အဖွားကပေးတဲ့နာမည်ပါ၊ ဖေဖေ၊ မေမေရှိစဉ်တုန်းကတည်းက အခုထိ ဗဲရာပါမကျန် မီလာ လို့ပဲ ခေါ်ကြသည်။ လူးဘာ ကတော့ မီ လို့ တစ်လုံးတည်းခေါ်လေ့ရှိခဲ့သည်။ လူးဘာက မီ့ထက် ၄နှစ်လောက်ငယ်သည်။ ငယ်ပေမဲ့ ဆရာလုပ်ချင်သည်။ မီလန်ကာကို လွှမ်းမိုးချင်သည်။ .. ဟိုဟာမစားနဲ့၊ ဒါ စားကြစို့.. လို့ စားသောက်ဆိုင် အတူသွားဖြစ်တိုင်း ဒီလို သူကရွေးချယ်သည်။ ..မီ .. ဒါလေးကလှတယ်။ ဒါကိုပဲယူ.. တဲ့၊ အ၀တ်အစားဝယ်ဖို့ အတူသွားဖြစ်ကြတိုင်း အဲဒီလို လူးဘာက အမိန့်ဆန်ဆန်ပြောသည်။ ဆံပင်တိုတာ လူးဘာ မကြိုက်၊ အရှည်ထားစေချင်သည်။ မီလန်ကာ က အရှည်ထားဖို့စိတ်မ၀င်စား၊ ခဏခဏဆံပင်ညှပ်ချင်သည်။ ဆံပင်ညှပ်တိုင်း လူးဘာစိတ်ဆိုးတော့သည်။ လူးဘာရှေ့ရောက်ရင် မီလန်ကာ ကလေးတစ်ယောက်လိုဖြစ်နေသည်။ မီလန်ကာ.. လူးဘာရှေ့မှာ သေးနုတ်ပျောက်ကွယ်လုမတတ်ဖြစ်နေခဲ့သည်။ ကြာတော့ မီလန်ကာ စိတ်ညစ်လာခဲ့ပြီ၊ ချစ်ရတာ ပျော်စရာလဲ မကောင်းလှ၊ မတွေ့ရရင် လွမ်းလှပေမဲ့ တွေ့ရတဲ့အခါ စိတ်ကျဉ်းကျပ်ရသည်။ လူးဘာရှေ့မှာ တစ်စက်ကလေးမှ ပေါ့ပေါ့ပါးပါးပျော်ပျော်ရွှင်ရွှင်ရှိမနေခဲ့၊ ဒီလိုနဲ့ မီလန်ကာနဲ့ လူးဘာ တဖြည်းဖြည်းဝေးလာခဲ့သည်။ မီလန်ကာ ကလည်း နီးဖို့မကြိုးစား၊ လူးဘာကရော ... သူလဲ ဝေးဖို့မပြင်ဆင်ခဲ့သလို နီးစပ်ဖို့ .. ဒါကိုလည်း မကြိုးစားခဲ့ပါဘူး၊

နောက်တစ်ယောက်ကတော့ မာကို၊ သူ့ကျတော့လဲ တကယ့်ကို တမျိုး၊ မီလန်ကာ ကို အပျောက်မခံနိုင်အောင် သည်းသည်းလှုပ်တတ်သည်။ မီလန်ကာကို တော်ကြောင်း၊ တတ်ကြောင်း အင်မတန်ချီးမွမ်းခန်းဖွင့်သည်။ ပြီးတော့ အဲဒါတွေကြောင့် အထင်တကြီးချစ်သည်ဆိုတော့ အဲဒါတွေမီလန်ကာမှာမရှိတော့ရင်၊ မီလန်ကာ သာညံ့နေမယ်ဆို .. ဒါလဲ မာကို သိပ်မဟုတ်လှဘူး ဟုတွေးမိခဲ့ပြန်သည်။ တစ်ရက်ကလေးမတွေ့လိုက်ရင် မာကို သေမလောက်လွမ်းပြတတ်သည်။ မီလန်ကာ သိပ်စိတ်ပျက်လှသည်။ တွေ့ပြန်ရင်လည်း မီလန်ကာ နေကောင်းရဲ့လား၊ ဘယ်လိုအခြေအနေရှိနေလဲ စူးစမ်းဖို့ထက်၊ သူ ဖြစ်နေတာတွေ ဆက်တိုက်ပြောပြဖို့ပဲ ကြိုးပမ်းတတ်သည်။ ပြောပြတတ်သည်။

“မနေ့ကဆို မာကို မီလာကိုလွမ်းလွန်းလို့ အိပ်လို့မရဘူး၊ မီလာ ထားသွားမလား တွေးပြီး စိတ်မကောင်းဖြစ်လွန်းလို့ လှေကားထိပ်မှာ ထိုင်ငိုလိုက်သေးတယ်၊ ညစာတောင် စားလို့မ၀င်ခဲ့ဘူး”
တဲ့၊

အဲဒါတွေအစချီပြီး သူ့ရဲ့ တူလေးက ဘယ်လိုကအစ၊ တူမလေးက ဘယ်လို၊ အမကတော့ ဘယ်လိုအဆုံး၊ သူ့အကြောင်းတွေပြောပြပြီး နောက်ဆုံးမှ မီလန်ကာကို စူးစမ်းတတ်သည်။ အော် ခက်ရချည့်၊ မီလန်ကာက မငိုနိုင်ဘူး .. မီလန်ကာမှီတွယ်ရမဲ့ပုခုံးပိုင်ရှင်က ပိုပြီး သည်းသည်းထန်ထန်ငိုကြွေးနေတော့တာကိုး .. ဘာမှမဟုတ်လောက်တဲ့ ကိစ္စသေးသေးတွေကို စာဖွဲ့မဆုံးဖြစ်နေတတ်သည်။ ဒီယောက်ျားလေးကတော့ သူ့အတ္တကို ဖွင့်ထုတ်ကြေညာဖို့ မီလန်ကာကိုရွေးချယ်ထားပုံရသည်။ မီလန်ကာ ဒါကိုမကြိုက်၊ ဒါကိုမှမဟုတ် မကြိုက်တာတွေမှ အများကြီးပဲ၊ နောက်ထပ်တစ်ယောက်၊ သူကတော့ အကြွားသန်ချင်ပုံရသည်။ မီလန်ကာရှေ့မှာ သူ့ရဲ့ ခေတ်ပေါ်လက်နက်ဆန်းတွေ တစ်ခုပြီးတစ်ခုထုတ်သုံးသည်။ အသံစုံထွက်တဲ့ကိရိယာတွေ သူ့မှာ  အများကြီးရှိသည်။ မီလန်ကာနဲ့တွေ့ဖြစ်ကြတဲ့ အချိန်မှာ ဖုံးခဏခဏပြောသည်၊ wifi လက်ပ်တော့ပ်သွားလေရာသယ်သည်။ wifi ရတဲ့ ကော်ဖီဆိုင်ကောင်းကောင်းမှာ ထိုင်လေ့ရှိသည်။ သဘောအင်မတန်ကောင်းသည်။ သူငယ်ချင်းတွေနဲ့ ပျော်ပျော်ပါးပါးသွားလာနေချင်သည်။ ဘီယာကြိုက်သည်။ သူငယ်ချင်းတွေစားချင်ရာ ကျွေးသည်။ သွားချင်တဲ့နေရာလိုက်ပို့သည်။ သူငယ်ချင်းလိုပေါင်းသင်းဆက်ဆံဖို့တော့ အကောင်းဆုံး ယောက်ျားလေးဖြစ်သည်။ ဒီလိုနဲ့ သူငယ်ချင်းအဆင့်မှာသာ ရပ်ထားလိုက်ပြီး မီလန်ကာ အေးအေးပဲနေဖြစ်တော့သည်။

ရုံးပိတ်ရက်တစ်နေ့ မီလန်ကာ အိမ်မှာ အလုပ်တွေရှုပ်နေချိန်ဖြစ်သည်။ စိတ်တွေလည်းရှုပ်ရသည်၊ ဘာကြောင့်လဲဆိုတော့ မီလန်ကာအွန်လိုင်းက adobeTV မှာ flash software lesson ဖိုင်တစ်ဖိုင်ကြည့်နေသည်။ တစ်ဆင့်ပြီးတစ်ဆင့်ကြည့်နေရင်း photoshop မှာ ၀က်ဆိုက်ဘ်တစ်ခုလုံးအတွက်သေချာဆွဲ၊ layer တွေမှာ နာမည်တွေကအစ သူ့ content နဲ့သူပေး၊ flash ကနေ အဲဒီ photoshop ဒီဇိုင်းဖိုင်ကို ဆွဲထည့်(import) လုပ်၊ import လုပ်တဲ့အခါမှာလည်း layer တစ်ခုစီကအစ movie clip တွေပြောင်းချင်သလား၊ ရိုးရိုး bitmap ပုံနဲ့ပဲ သိမ်းမလား၊ photoshop မှာ gradient နဲ့ ဒီဇိုင်းချလာရင် flash ထဲကို သိမ်းတဲ့အခါ မူလဒီဇိုင်းအတိုင်းရချင်ရင် ဘယ်လိုသိမ်းရမယ် တစ်ဆင့်စီရှင်းပြသွားပေးတဲ့ www.lynda.com ရဲ့ ဗီဒီယိုဖိုင်က စိတ်ဝင်စားဖို့ကောင်းလှသည်။ မီလန်ကာ ပို ပိုပြီး စိတ်ဝင်စားလာတဲ့အချိန် နောက်တစ်ဆင့်မှာတော့ ပိုက်ဆံသွင်းမှ ကြည့်လို့ရတော့မည်တဲ့၊ စိတ်ကုန်လိုက်တာကွယ်..  အဲဒီအချိန်လေးမှာပဲ ဗဲရာဖုန်းခေါ်လာခဲ့သည်။ ကော်ဖီဆိုင်သွားကြပါစို့ လို့ ဗဲရာက ခေါ်သည်။ စိတ်ညစ်စိတ်ရှုပ်နေတဲ့ မီလန်ကာလည်း ချက်ချင်းပဲ သဘောတူလိုက်ပါသည်။

ဒီလိုနဲ့ မီလန်ကာနဲ့ ဗဲရာ ကော်ဖီဆိုင်လေးတစ်ဆိုင်ရောက်နေကြပြီ၊ ကော်ဖီဆိုင်လေးနာမည်က “ကံကြမ္မာ”တဲ့၊ အဲဒီကော်ဖီဆိုင်လေးမှာ ကော်ဖီသောက်သူတွေအနာဂါတ်အကြောင်းမေးမြန်းလို့ရသည်။ ကော်ဖီခွက်တွေကိုကြည့်ပြီး .. အတိအကျဆိုရလျှင် ကော်ဖီခွက်မှာ တင်ကျန်နေတဲ့ ပုံသဏ္ဍာန်တွေကို ကြည့်ပြီး ဗေဒင်ဟောပေးသည်လို့ ဗဲရာက သတင်းပေးသည်။ တူရကီကော်ဖီ (Turkish coffee) တစ်မျိုးတည်းသာရပြီး  ကော်ဖီကိုပဲသီးသန့်သောက်ချင်သူတွေ အတွက်လဲ နေရာသပ်သပ်လုပ် ပေးထားသည်။ ဘာမဆို စူးစမ်းချင်တဲ့ ဗဲရာကတော့ ဗေဒင်ဟောပေးမည့်အမျိုးသမီးကြီးကို မေးမြန်းစပ်စုနေနှင့်ပြီ၊ မီလန်ကာ ဗေဒင်ကိုစိတ်မ၀င်စား၊ အယုံအကြည်မရှိလှပါ၊ ဗဲရာနှင့် စကားပြောနေသည့်အမျိုးသမီးကြီးကတော့ စိတ်ဝင်စားဖို့ကောင်းလှသည်။ သလင်းကျောက်သားပုတီးစေ့ကြီးကြီးတွေ အများကြီးပါသည့် ပုတီးကိုလည်မှာဆွဲလို့၊ စီးကွင့်များများမှူန်းခြယ်ထားထားတဲ့ အနီရဲရဲပုဝါစကို ဦးခေါင်းမှာစည်းထားသည်။ နှုတ်ခမ်းနီရဲရဲ စိုလက်လက်နဲ့ လက်သည်းရှည်တွေကလည်း အနီစစ်စစ် အရောင်ကိုပဲ ဆိုးထားပြန်သေးသည်။ လက်နှစ်ဘက်မှာ အဆင်တန်ဆာပုတီးလက်ကောက်တွေအများကြီးပဲ ၀တ်ထားသည်။ နားဆွဲကလည်းကြီးလွန်းသည်။ မျက်စိနောက်အောင်ကို လှုပ်ခါလွန်းလှသည်။ ဂါဝန်ဖါးဖါးကလည်း ဂျစ်ပဆီအမျိုးသမီးတွေရဲ့အဆင်အပြင်ပုံစံမျိုးပါပဲ၊ အဲဒီအမျိုးသမီးကြီးရဲ့ကိုယ်အလေးချိန်ကတော့ ပုတီးစေ့တွေနဲ့ကိုပဲ တော်တော်ကြီးလေးနေလောက်ပြီလို့ မီလန်ကာ ကပ်ကပ်သပ်သပ်တွေးရင်း ပြုံးမိသေးသည်။ တကယ်ပါပဲ အဲဒီအမျိုးသမီးကြီးရဲ့ ခေါင်းအငဲ့၊ လက်အရွှေ့မှာ သလင်းပုတီးစေ့တွေရဲ့ အလင်းတွေကလက်ကနဲ၊ လက်ကနဲ၊ ပြိုးပြိုးပြက်ပြက် ကြည်လို့တော့ ကောင်းလှသည်။ ဗဲရာနှင့်စကားပြောနေရင်းမှာပဲ အဲဒီအမျိုးသမီးကြီးရဲ့ အကြည့်တွေက မီလန်ကာဆီ ခဏခဏ ရောက်လို့လာတော့၊ မီလန်ကာ စိတ်ထဲတွေးနေတာပဲ သိသွားမလား တွေးမိလိုက်သေးသည်။ ကိစ္စတော့မရှိပါ၊ လူတိုင်းက အတွင်းစိတ်မှာရောက်ယက်ခတ်တွေးတောရင်း မသိမသာကဲ့ရဲ့ အတင်းဆိုတတ်ကြတာပဲမဟုတ်လား၊ မီလန်ကာ က ကဲ့ရဲ့အပြစ်ဆိုချင်တာထက် စိတ်ဝင်စားစရာ ကောင်းလွန်းလှတဲ့ အဲဒီအမျိုးသမီးကြီးကို သဘောကျသွားရုံ၊ မှတ်ချက်ပေးမိရုံလေးပါပဲ။

အဲဒီအမျိုးသမီးကြီးက ဗဲရာနှင့်စကားဆိုနေရင်းမှာပဲ မီလန်ကာစားပွဲဆီရွှေ့လာခဲ့သည်။ မီလန်ကာကို ပြုံးမြမြနှုတ်ဆက်တော့မှ အနီးကပ်မြင်ရတဲ့ သူမက ထင်သလောက်အသက်မကြီးသေး၊ မျက်ဝန်းတွေကနုနုညံ့ညံ့၊ လေသံကလဲခပ်ချိုချို
“မိန်းကလေးရေ၊ မင်းရဲ့ကော်ဖီခွက်ကို နောက်နေ့စပ်စုပါရစေကွဲ့”
တဲ့၊ သူမက ဆိုသည်။

မီလန်ကာ စိတ်အိုက်မိသည်၊ သူမကပဲ ထပ်ပြောပြန်သေးသည်။

“ပိုက်ဆံပေးစရာမလိုဘူးကွဲ့၊ အပျင်းပြေစကားပြောရင်း ငါက မင်းရဲ့အကြောင်း ပြောပြချင်လာရင် ပြောပါရစေပေါ့၊ မင်းလဲ လက်ခံမယ်လို့ ငါတော့ မျှော်လင့်မိတာပဲ၊ မိတ်ဖြစ်ဆွေဖြစ်ပေါ့ကွယ်”
လို့ အဲဒီအမျိုးသမီးက ဆက်တိုက်ပြောလာသည်။
သူမအမည်က ယဲလီနာတဲ့၊ မီလန်ကာ ငြင်းဆန်လိုစိတ်မရှိခဲ့ပါ၊ သူမမှာ မမြင်မသိနိုင်တဲ့ စွမ်းအားတစ်ခုခုတော့ရှိနေသည် ထင်မိသည်။ မီလန်ကာ ပေါ့ပေါ့ပါးပါးပြုံးရင်း

“နောက်တစ်ကြိမ်ဆုံကြသေးတာပေါ့၊ တကြိမ်မကလည်းဆုံနိုင်ကြသေးတာပဲ၊ ကျွန်မက ကော်ဖီဆို သိပ်ကြိုက်တဲ့သူလေ”
လို့ စကားပြန်လိုက်မိသည်။

နောက်တော့ ဆိုင်ခန်းအပြင်အဆင်လှလှ၊ ကော်ဖီကောင်းကောင်း “ကံကြမ္မာ” ကော်ဖီဆိုင်လေးကို ဗဲရာနှင့် ခဏခဏရောက်ဖြစ်ကြသည်။ ရောက်တိုင်းလည်း ကော်ဖီဆိုင်က ယဲလီနာနှင့် စကားလက်ဆုံကျ ပြောကြဆိုကြသည်။ တခြား ကော်ဖီဗေဒင်ဖတ်ပေးနေတဲ့အမျိုးသမီးတွေလဲ ၄၊ ၅ ဦးခန့် ရှိနေပေမဲ့ ယဲလီနာနှင့်သာ မီလန်ကာတို့ အဖွဲ့ကျခဲ့ကြသည်။ ကော်ဖီဗေဒင် နိမိတ်ဖတ်ပုံဖတ်နည်းတွေ မီလန်ကာမမေးပါပဲနဲ့ ယဲလီနာက ရှင်းပြလေ့ရှိသည်။ မီလန်ကာ ကော်ဖီကိုမသောက်ခင် ယဲလီနာက အမြဲသတိပေးသည်။

“မီလာရေ၊ (နောက်ပိုင်းတော့ သူမက မီလာလို့ပဲ ဗဲရာခေါ်သလိုလိုက်ခေါ်သည်၊)၊ ကော်ဖီကို တစ်နေရာထဲကပဲသောက်နော်၊ နေရာအမျိုးမျိုးပြောင်းမသောက်နဲ့၊ ပြီးရင် ကော်ဖီအောက်ခံပန်းကန်ပြားနဲ့ဖုံးကွဲ့၊ ပြီးတော့ မီလာလိုချင်တဲ့ ဆုကိုတောင်းရဦးမယ်၊ ဆုတောင်းပြီးရင် ကော်ဖီခွက်ကို ရင်ဘတ်နားမှာ အဖုံးကို အုပ်လျက်သား ကိုင်ထား၊ နာရီလက်တံအတိုင်း ဖြည်းဖြည်းချင်း အကြိမ်နည်းနည်းလှည့်ပေးရမယ်နော်၊ ပြီးရင်တော့ ကော်ဖီခွက်မှောက်လျက်သားအနေအထားမှာ ပြန်ချထားပြီး အေးအောင် ခဏစောင့်ပေး၊ တို့ မီလာအနာဂါတ်ကိုဖတ်ချင်တယ်” လို့ ယဲလီနာကဆိုသည်၊

တစ်ခါတစ်ရံမီလန်ကာ ကော်ဖီခွက်အအေးခံနေတဲ့အချိန် ကော်ဖီခွက်ပေါ်မှာ ပိုက်ဆံအကြွေစေ့တစ်စေ့ကို လာတင်ထားတတ်သည်။ မကောင်းတဲ့နိမိတ်တွေကို အဝေးသို့နှင်ပစ်နိုင်သည်တဲ့၊

“အမှန်က ကော်ဖီခွက်မြန်မြန်အေးအောင်လို့ပါ”
လို့ ယဲလီနာ စိတ်လိုလက်ရရှိသည့်အခါ နောက်တီးနောက်တောက်ပြောတတ်သေးသည်၊

“ကော်ဖီခွက်ကို ကော်ဖီသောက်သူကိုယ်တိုင်မဖွင့်ရဘူး၊ ကော်ဖီခွက်ကို ဖတ်မဲ့သူကသာဖွင့်ရမယ်၊ open the heart လို့ မီလာက ရွတ်ရမယ် ”
လို့ ယဲလီနာက သင်သည်။

မီလန်ကာတော့ မယုံပေမဲ့ အပျင်းပြေလိုက်လုပ်ကြည့်ပါသည်။

ဗဲရာကတော့ အကြိမ်တိုင်းမေးသည်။ တခြားအမျိုးသမီးတွေနှင့် ကြုံသလိုမေးသည်။ သိပ်မှန်တာပဲလို့ ဗဲရာက တပြုံးပြုံးနှင့် ကျေနပ်စွာဖြေသည်။ ဘာတွေမှန်နေလဲတော့ မီလန်ကာ သေသေချာချာ မစပ်စုနိုင်သေးပါ။

ယဲလီနာက မီလန်ကာ ကော်ဖီခွက်အတွင်းက ကော်ဖီအနှစ်တွေကိုကြည့်ကာ “အိုး ခွေးလေးပါလား၊ ဒါ မီလာ့မှာ သိပ်သစ္စာရှိတဲ့ သူငယ်ချင်း၊ ဆွေမျိုးရှိရမယ် လို့ဆိုတာ” တဲ့၊ မီလန်ကာက ဗဲရာကို ညွှန်ပြရင်း “သူပေါ့” လို့ ဆိုတော့ ယဲလီနာ အားပါးတရပြုံးပါသည်။ မီလန်ကာ ကော်ဖီခွက်ကို ယူကြည့်မိတော့ ကော်ဖီအနှစ်တွေ တဖွားဖွားပြန့်ကျဲနေသလိုသာ မြင်သည်။ ဘာခွေးပုံလေးမှမတွေ့၊ ဗဲရာကိုသာ ခွေးလေးဗဲရာလို့ စနောက်မိတော့သည်။ ဗဲရာကလည်း တဟားဟားရယ်မောနေခဲ့သည်။

“ပန်းသီးပုံစံ တွေ့ရရင် ဗဟုသုတကြွယ်ဝတဲ့သဘော၊ အတန်းပညာပြီးဆုံးခြင်း၊ ဒီပလိုမာတစ်ခုခုရခြင်းမျိုးပေါ့၊ ငှက်လေးတွေ ပျံနေတဲ့ပုံမျိုးဆိုရင် သတင်းကောင်းကြားရတော့မယ်ကွဲ့၊ ဖယောင်းတိုင်းလေးမြင်ပြီဆိုရင်တော့ အသိဥာဏ်ပညာ တိုးတက်ဦးမယ်၊ ကြောင်လေးဆိုရင် ကလိန်ဥာဏ်ဆင်မယ့်သူငယ်ချင်း ဆွေမျိုးရှိတတ်လို့ သတိထားရမယ်၊  ယစ်ဘီးနဲ့လွှတ်ရတဲ့ စွန်ပုံတွေ့ရင် မင်းရဲ့ဆန္ဒတွေအမှန်တကယ်ဖြစ်လာတော့မယ်ဆိုတဲ့သဘောပေါ့၊ အိုး ကျီးနက်ကြီးတော့ မတွေ့တာအကောင်းဆုံးပဲ၊ သူက သေဆုံးခြင်းနဲ့ သတင်းဆိုးတွေပဲ ယူလာပေးတတ်တယ်”
လို့ ယဲလီနာက ရှင်းပြခဲ့သည်။

ယဲလီနာပြောပြတဲ့ကော်ဖီနိမိတ်ဖတ်ခြင်းပညာက မီလန်ကာအဖို့တော့ပျော်ရွှင်စရာကောင်းလှသည်ဟု ထင်မိခဲ့ပေမဲ့ တစ်နေ့တော့ ယဲလီနာအလန့်တကြားပြောလာသည်။

“မီလာရယ် သတိတော့ထားကွဲ့ မင်းရဲ့ခွက်ထဲမှာ ကျီးနက်ကြီးတစ်ကောင် တို့တွေ့နေတယ်” တဲ့၊

ပြီးတော့ ထပ်ပြီးရှင်းပြသေးသည်၊ နိမိတ်ဖတ်တဲ့အခါ တ၀က်စီခွဲခြားပြီးဖတ်ရသည်။ အပေါ်တစ်ဝက်က အနာဂါတ်အတွက်ဖြစ်ပြီး အောက်ဖက်တစ်ဝက်မှာထင်ကျန်နေတဲ့ပုံရိပ်တွေက အတိတ်အတွက်ဖြစ်သည် လို့ဆိုသည်။ အဲဒီတ၀က်စီမှာမှ ညာဘက်ခြမ်းအပိုင်းတွေက နမိတ်ကောင်းတွေအဖြစ်ဖတ်ရပြီး၊ ဘယ်ဘက်ခြမ်းမှာက မကောင်းတဲ့ကိစ္စရပ်တွေ၊ ရန်သူတွေ၊ ဖျားနာခြင်းနဲ့ ပြဿနာတွေနဲ့ တခြားဆင်တူအဆိုးတွေအတွက် ဖတ်ရသည်တဲ့၊ ကော်ဖီနိမိတ်ဖတ်တဲ့အခါ တခြားယုံကြည်မှုတစ်ခုက လာမယ့်ရက်ပေါင်း ၄၀ အတွင်းဖြစ်မယ့်ကိစ္စမျိုးသာ ဟောပြောနိုင်သည်။ အဲဒီရက်ကျော်သွားတဲ့အချိန်အတွက် ဖတ်တဲ့အခါ မမှန်နိုင်တော့ဘူးလို့လဲ ဆိုသည်။ ယဲလီနာက ထပ်ပြောသေးသည်။ ခွက်မှာရှိတဲ့ကော်ဖီအနှစ်တွေရော၊ အောက်ခံပြားမှာ ထင်ကျန်နေတဲ့ပုံရိပ်တွေပါ ကြည့်ပြီး အသေးစိတ် ဖတ်ရသေးသည်။ အောက်ခံပြားက ကော်ဖီခွက်ပိုင်ရှင်ရဲ့ အိမ်၊ မိသားစုဘ၀ကို ရည်ညွှန်းသည် လို့ ဆိုသည်။ ဒီတစ်ခါ မီလန်ကာကော်ဖီခွက်ရဲ့ အောက်ခံပြားမှာ ကျီးနက်ကြီးပုံရိပ်တွေ့သည်ဟု ထပ်ပြီးသတိပေးရင်းပြောပြန်သည်။ ယဲလီနာပြောချင်တာက မီလန်ကာရဲ့ မိဘဆွေမျိုးတစ်ဦးဦးဖျားနာသေဆုံးနိုင်တယ် တဲ့၊ ပြီးတော့ ခွက်အတွင်းမှာလဲ ဘယ်ဘက်အပေါ်ခြမ်းမှာ ရှုပ်ရှုပ်ထွေးထွေးပုံရိပ်တွေ တွေ့နေတော့ လာမယ့် ရက် ၄၀ အတွင်း သတိထားဖို့ ယဲလီနာ အထပ်ထပ် သတိပေးနေခဲ့သည်။ မီလန်ကာက အစထည်းက အယုံအကြည်ရှိသူမဟုတ်၊ ယဲလီနာကိုတောင် စိတ်မပူဖို့ ပြန်ပြီးဖျောင်းဖြလိုက်ရသေးသည်။

ထူးခြားလွန်းလှတဲ့တိုက်ဆိုင်မှုလေလား... ယဲလီနာကော်ဖီနိမိတ်ဖတ်ပြီး တစ်လခန့်အကြာ မီလန်ကာတောင် အဲဒီနိမိတ်ဆိုးကိုမေ့နေတဲ့အချိန်မှာမှ.. အဲဒီညတစ်ညမှာ ... အဘွားက အစောကြီးပဲအိပ်ရာဝင်ဖို့ပြောလာသည်။ သူ ဒီနေ့ မျက်တောင်တွေစင်းကျလာအောင်ငိုက်မျဉ်းနေသည်တဲ့၊ ကျန်တာတော့ အားလုံးအကောင်းပကတိ၊ တခြားရက်တွေထက် ထူးထူးခြားခြားပိုမိုအိပ်ချင်နေခဲ့တာတစ်ခုပဲ၊ အဘွား အိပ်ရာထဲဝင်သွားပြီးနောက် မီလန်ကာလဲ အိပ်မက်လှလှမက်စေဖို့ နှုတ်ဆက်နေကြအတိုင်း နှုတ်ဆက်လိုက်သေးသည်။ နောက်တစ်နေ့မနက်ခင်းမှာတော့ အဘွားက နိုးထမလာတော့ပါ၊ တကယ့်ကို မနိုးတဲ့အိပ်ခြင်းမျိုးနဲ့ အိပ်စက်နေခဲ့ပြီ၊ “ယဲ...လီနာ ... ” မီလန်ကာ အလန့်တကြားရေရွတ်လိုက်မိသည်။ ပြီးတော့ မီလန်ကာ ၀မ်းနည်းစွာငိုကြွေးမိသည်။

အဘွားကိစ္စတွေအားလုံးပြီးတဲ့တစ်နေ့မှာတော့ ဗဲရာနဲ့ပဲ မီလန်ကာ ကော်ဖီဆိုင်လေးကို သွားခဲ့ပြန်သည်။ မီလန်ကာ .. ယဲလီနာကို သိပ်တွေ့ချင်နေခဲ့သည်။ ယဲလီနာပြောသောစကားတွေ နိမိတ်တွေအကြောင်း ဘာမဆို ပိုပြီးသိချင်လာခဲ့သည်။ ယဲလီနာကို အဘွားအကြောင်းပြောပြတော့ .. မီလန်ကာကို သနားကြင်နာခြင်းကြီးစွာ ပွေ့ဖက်နှစ်သိမ့်လေသည်။ မီလန်ကာကျောကို အသာအယာပွတ်သပ်ရင်း

“ဒီနေ့ ကော်ဖီသောက်ဦးမှာပဲလားကွဲ့”
ဟု မေးသည်။ မီလန်ကာကလည်း

“သေချာတာပေါ့၊ ကော်ဖီလဲ သောက်ဦးမယ်၊ ယဲလီနာကလည်း မီလန်ကာအတွက် နိမိတ်ဖတ်ပေးရဦးမယ်”
လို့ ပြောချလိုက်တော့၊

ယဲလီနာက “နိမိတ်ဆိုးတွေမကြောက်ဖူးလား” တဲ့ မေးလာသည်၊

“နိမိတ်ဆိုးဆိုတာ အမြဲရှိနေနိုင်တာမှမဟုတ်တာ၊ အဆိုးရှိသလို အကောင်းလဲ ရှိနိုင်တာပဲမဟုတ်လား”
လို့ မီလန်ကာ ဆက်ကနဲ ပြန်မေးလိုက်တော့မှ ယဲလီနာ အပြုံးယဲ့ယဲ့ပြုံးပြရင်း၊ “ဟုတ်သားပဲကွယ်” လို့ ခေါင်းငြိမ့်ထောက်ခံလေသည်။

“ကဲ စကြဦးစို့ရဲ့”
ဟု ခါးကိုဆန့်ဆန့်ပြန်မတ်ရင်း ယဲလီနာကဆိုသည်၊

အဲဒီနောက်တော့ ယဲလီနာ အရင်က ပြောနေကြအတိုင်း၊ တစ်နေရာထဲက ကော်ဖီကိုသောက်ရမယ် ဆိုတာနဲ့အတူ ဆောင်ရန်၊ ရှောင်ရန်တွေ ဆက်တိုက်ပြောသည်။ မီလန်ကာလည်း အဆင့်ဆင့် ရင်ဘတ်နားဆီဆွဲယူ နာရီလက်တံအတိုင်း အကြိမ်နည်းနည်းလှည့်ပြီး နောက်တော့ ကော်ဖီခွက်အေးအောင်စောင့်ကြရင်း စကားတွေဆက်ပြောကြပြန်သည်။ ဗဲရာကတော့ သူ့ကော်ဖီခွက်မှာ ပျံသန်းနေတဲ့ငှက်လေးတွေတွေ့ရတယ်ဆိုတဲ့အကြောင်းပြောပြလေသည်။ ဗဲရာက ရက် ၄၀ အတွင်း ဘယ်လိုသတင်းကောင်းကြားရလေမလဲ စောင့်ရမည်ဟု စိတ်လှုပ်ရှားစွာပြောသည်။ ကော်ဖီအေးလောက်တဲ့အချိန်ရောက်တော့ open the heart လို့ မီလန်ကာကပြောပြီး၊ ယဲလီနာကော်ဖီခွက်ကိုဆွဲမတဲ့အခါ အောက်ခံပြားလေးနဲ့ကပ်နေကာ လုံးဝခွာမရ၊  “အိုး သိပ်ကောင်းတာပဲ” လို့ယဲလီနာက လွှတ်ကနဲအော်လိုက်သည်။ ကော်ဖီနိမိတ်ဖတ်သူတို့ ယုံကြည်တာက အောက်ခံပြားနှင့် ခွာမရရင် အဲဒီကော်ဖီခွက်အတွက် မဖတ်သင့်၊ ဖတ်စရာမလိုလောက်အောင် အားလုံးကောင်းနေတယ်လို့ ယုံကြည်ကြသည်လို့ ယဲလီနာက ပြောပြပြန်သည်။ မီလန်ကာအတွက် နောက်ထပ်စိုးရိမ်ပူပန်စရာကိစ္စတွေ မရှိနိုင်ပါလို့ ယဲလီနာက အခိုင်အမာဆိုသည်။

အဲဒီရက်တွေအတွင်း ဗဲရာသိပ်ပျော်နေသည်ဟုထင်မိသည်။ အမြဲသွက်လက်နေတဲ့ဗဲရာကို ရုံးမှာလည်း  ပိုပြီး ပြုံးချိုပျော်ရွှင်နေသည်ဟု မီလန်ကာ တွေးနေမိသည်။ အဲဒီညနေမှာ ဗဲရာက ပြောစရာရှိသည်ဟုဆိုသည်။ “ကံကြမ္မာ” ကိုပဲ သွားကြရအောင်တဲ့၊ မီလန်ကာတို့ ကော်ဖီဆိုင်လေးဆီ ဦးတည်ခဲ့ကြသည်။ ဗဲရာက ကော်ဖီဆိုင်လေးရောက်တော့ ကော်ဖီမှာရင်း စောင့်နေကြဆဲ သူ ဘ၀လက်တွဲဖော်တွေ့ပြီဟု ဆိုသည်။ စိန်နားကပ်လို ယောက်ျားလေးမျိုး သူတွေ့ထားပြီလို့ ပြောသည်။ ဒီနားကပ်ကိုတော့ သူ အမြဲတပ်တော့မည်လို့ဆိုသည်။ ယဲလီနာလည်း အနားမှာရှိနေခဲ့သည်။

“ကဲ.. ကဲ ဒါဆို မိတ်ဆက်ပေးတော့၊ ဗဲရာရေ ၊ အချိန်မဆွဲနဲ့ တော့”
လို့ဆိုတော့ ဗဲရာလှလှလေးပြုံးပြသည်၊

“မီလာသိပါတယ်”
တဲ့၊

“မသိလိုက်ပါဘူး၊ ဗဲရာက အမြဲနားကပ်လေးတွေနဲ့အလုပ်ရှုပ်နေတာလေ၊ ဘယ်နားကပ်လေး တကယ်ကြိုက်မှန်းမသိလိုက်ဘူး”
လို့ မီလန်ကာလျှာထုတ်ပြောင်ပြရင်း နောက်လိုက်တော့ ဗဲရာက တခစ်ခစ်ရယ်မောတော့သည်။
ဗဲရာက ဒီ “ကံကြမ္မာ”ကော်ဖီဆိုင်လေးရဲ့ပိုင်ရှင်နဲ့ လက်တွဲတော့မည်ဟု အတိအကျကြေညာလေသည်။ တူရကီ၊ ဘူလ်ဂေးရီးယား ဘက်မှာပါ ကော်ဖီဗေဒင်ဆိုင်ခွဲတွေ ဖွင့်ထားတဲ့ ဗဲရာအဆိုအရ စိန်နားကပ်လို ဒီယောက်ျားလေးက သူမနဲ့အသင့်တော်ဆုံးလို့ ဆိုလေသည်။ ဗဲရာလူကဲခတ်မမှားနိုင်ပါ၊ မီလန်ကာလဲ မြင်ဖူးတွေ့ဖူးနေခဲ့ပါသည်။ အင်မတန်မွန်ရည်ပြီး အေးဆေးတည်ငြိမ်သလောက် အလုပ်မှာစိတ်ဝင်စားတဲ့ စိန်နားကပ်လေးနဲ့ စိတ်ထားဖြူလှသူလေး ဗဲရာ အတွက် မီလန်ကာ ကြည်ကြည်နူးနူး ၀မ်းသာပျော်ရွှင်ရသည်။


နောက်ပိုင်း ဗဲရာနဲ့ ဒီဆိုင်လေးကိုရောက်ချိန်တိုင်း ဗဲရာက စိန်နားကပ်လေးနဲ့ အလုပ်ရှုပ်နေသလို မီလန်ကာနဲ့ ယဲလီနာလည်း စကားတွေတွတ်ထိုးကြသည်။ ယဲလီနာကလည်း မီလန်ကာအတွက် ကော်ဖီနိမိတ်တွေလဲ ဖတ်ပေးနေဆဲ၊ မီလန်ကာ ကော်ဖီခွက်ထဲမှာ ငှက်ကလေးတွေအများကြီးပဲ ပျံနေတာတွေ့တဲ့အခါတွေ့၊ မီးစာတလွင့်လွင့် ဖယောင်းတိုင်လေးတွေ တွေ့ပြန်ပြီဟု ပြောတဲ့အခါပြောလိုက်၊ ယဲလီနာပြောသမျှ မီလန်ကာအတွက် အကောင်းတွေပဲဖြစ်နေတော့သည်။ ယဲလီနာက ခုနောက်ပိုင်း ပိုပိုပြီး စနောက်ရင်း ပြောလာသည်။

“မီလာရဲ့ ဖယောင်းတိုင်းလေးကလင်းလှချည်ရဲ့၊ ငှက်ကလေးတွေများဟာလည်း အများကြီးပဲ ပျံသန်းလို့နော်၊ မီလာ သတင်းကောင်းကြားရတော့မယ်။ တစ်ခုခုကို အသေအချာ ထူးခြားရစေ့မယ်ကွဲ့”
လို့ ခဏခဏပြောတတ်လာသည်။

မီလန်ကာ ကတော့ “ဘာ သတင်းမျိုးပါလိမ့်၊ ဘာတွေထူးခြားရမှာတဲ့လဲ ယဲလီနာ၊ မီလန်ကာ ယောက်ျားယူရတော့မယ်တဲ့လား” လို့ စနောက်ချင်လှစွာ တဲ့တိုး မေးလိုက်တော့သည်။ အဲဒီလိုမေးလိုက်တိုင်း မီလန်ကာ့အနားက ယဲလီနာ လှစ်ကနဲ ပြေးထွက်သွားလေ့ရှိသည်။

ဒီလိုနဲ့ပဲ ယဲလီနာရဲ့ကော်ဖီဗေဒင် မှန်ရဦးမယ့် နေ့တစ်နေ့ရောက်လာခဲ့ပြန်သည်။

“မီလန်ကာ .. ကိုယ် က မီလိုရာဒ့်ပါ၊ မီလာကို သိနေခဲ့တာ ကြာခဲ့ပြီ၊ မီလာ ဒီဆိုင်လေးကို ပထမဆုံး စရောက်လာခဲ့တဲနေ့ကတည်းက ယဲလီနာ့ကို မျက်မှောင်ကျုံ့ရင်း စပ်စုနေတဲ့ မိန်းကလေးကို ကိုယ်အစွဲကြီးစွဲသွားခဲ့တာ၊ ကိုယ့်ဘာသာ ပြန်မေးရင်း၊ မီလာအကြောင်းတွေလဲ စုံစမ်းရင်းနဲ့ပဲ ...... ကိုယ် အချိန်ယူခဲ့ပြီးပါပြီ၊ ဒီနေ့တော့ ကိုယ် .. ပြောပါရစေတော့၊ ကိုယ့်ဘက်က သေချာခဲ့ပြီ၊ မီလာ့ကို လက်ထပ်ပါရစေ”

ဆိုပြီး စကားအစချီပြောလာတဲ့ သူ့ကို ကြည့်မိတော့ ... အရပ်ရှည်ရှည် နူးနူးညံ့ညံ့ မျက်ဝန်း၊ မီလန်ကာထက် အများကြီး အသက်ကြီးပုံရတဲ့ သူ့ကိုကြည့်ရင်း သူ ဆက်ပြောလာတဲ့ သူ့အကြောင်းတွေ နားထဲမကြားတစ်ချက်၊ ကြားတစ်ချက်၊ ကလေးလဲ မဟုတ်ပါပဲနဲ့ မီလန်ကာ ဆက်ကျော်သက်လေးလို ရင်တွေ အဆမတန် ... တဒိတ်ဒိတ်ခုန်လို့ ...

ဗဲရာဆီ လှမ်းကြည့်လိုက်တော့ ဗဲရာက အားလုံးကို သိနေသလို မီလန်ကာ့ကို ပြုံးပြုံးလေးစိုက်ကြည့်နေသည်။ ခေါင်းလေးတစ်ချက် ဆတ်ပြသည်။

ဗဲရာရဲ့ ခေါင်းလေးဆတ်ကနဲ အငြိမ့်မှာ ဗဲရာ နားက စိန်နားဆွဲ အရောင်လေးက ပြိုးကနဲ ပြက်ပြက် တစ်ချက်ထလက်လေသည်။

တကယ်ပါပဲ ... ကော်ဖီဗေဒင် စိတ်ဝင်စားဖို့ကောင်းလှသည်။
ယဲလီနာရဲ့ ... ကော်ဖီဗေဒင် မှန်ရဦးတော့မည်။         ။
Nweni Magazine, March, 2011
လာလည်တဲ့သူငယ်ချင်းအားလုံး ကျေးဇူးတင်ပါတယ်၊ ပျော်ရွှင်ချမ်းမြေ့ကြပါစေ

3 comments:

  1. reali nice one...

    ReplyDelete
  2. ဖတ်လို့ကောင်းတယ်...
    ကွန်မဲန့်ဆက်တင်းပျောက်သွားတာကိုး..
    တို့က တို့လိုဖြုတ်ထားလိုက်ပြီ ထင်နေတာ :)

    ReplyDelete
  3. ကော်ဖီကြိုက်သူမို့ ကော်ဖီဗေဒင်လေးကိုလဲ စိတ်ဝင်စားသား..
    နူးနူးညံ့ညံ့ချစ်စရာအရေးအသားလေးပါဘဲ.. ဖတ်လို့သိပ်ကောင်းတယ်..

    ReplyDelete