ပုံပြင်ထဲက ကျွန်မတို့တွေ (ငှက်တောင်သုံးချောင်းနဲ့ မိုင်းတူးသမားလေး)

ပုံပြင် ၇

နဲရှောပြောပြတဲ့ “ငှက်တောင်သုံးချောင်းနဲ့ မိုင်းတူးသမားလေး”

ရွာတစ်ရွာမှာ မိုင်းတူးသမားလေးတစ်ယောက်ရှိရောတဲ့၊ သူ့မှာ မိဘတွေကမရှိကြတော့ဘူး၊ အဖွားနဲ့ပဲ နေတယ်တဲ့၊ (ဘာလို့မိဘတွေမရှိတော့တာလည်း မမေးတော့ပါဘူး၊ ပုံပြင်ရှေ့ကိုမရောက်မှာစိုးလို့) အဖွားနဲ့ မိုင်းသမားလေးက သိပ်ပြီး ဆင်းရဲကြတယ်၊ သူတို့ရဲ့ အိမ်ဆိုတာကလည်း လုံလုံခြုံခြုံကြီးမဟုတ်ဘူး၊ အဲဒီရွာလေးမှာ နေနေကျမို့လိုသာပဲ၊ မိုင်းသမားလေးက တစ်နေကုန် အိမ်နဲ့ ခပ်ဝေးဝေး မိုင်းတွင်းကိုသွားရပြီး ညနေမိုးစုပ်စုပ်ချုပ်မှ အိမ်ကိုပြန်ရတယ်၊ မိုင်းသမားလေးက ဆင်းရဲလွန်းလှပေမဲ့ အင်မတန်ရိုးသားတယ်၊ အဖွားကိုလည်း သိပ်ချစ်ရှာတာ၊ အဖွားကလည်း မြေးလေးကို သိပ်ဂရုစိုက်တာပဲ၊ မိုင်းတူးသမားလေးမှာ သူ့လိုပဲ ပိုက်ဆံမရှိပဲ ရိုးသားတဲ့မိန်းကလေးတစ်ယောက်နဲ့လည်း ချစ်ကြိုက်နေသတဲ့၊ ဒါပေမဲ့ သူတို့က လက်မထပ်နိုင်ကြသေးဘူး၊ နေစရာကလည်းအဆင်မပြေကြဘူး၊ ငါတို့တွေ ပိုက်ဆံစုကြဦးစိုရဲ့လို့ နှစ်ဦးသား သဘောတူ ပိုက်ဆံစုနေကြတဲ့အချိန်ပေါ့၊ တစ်နေ့တော့ မိုင်းသမားလေး မိုင်းတွင်းအလုပ်မှာ ရှိနေတဲ့အချိန် အဖွားက အိမ်မှာဆုံးပါးသွားရော၊ အဖွားရှိနေတုန်းကတော့ အိမ်နီးချင်းတွေက သိနေတော့ ဘာမှမလုပ်ကြပေမဲ့ အဖွားလည်း  အသက်မရှိတော့ဘူးလည်းဆိုရော၊ အိမ်နီးချင်းတွေက ရှိသမျှပစ္စည်းတွေ အကုန်သယ်မကုန်ကြတယ်၊ မိုင်းသမားလေးလည်း ညမိုးချုပ်အလုပ်ပြီးလို့ အိမ်လည်းပြန်လာပါလေရော .. အိမ်မှာ ပစ္စည်းတွေ ဘာတစ်ခုမှမရှိတော့ဘူး အဖွားကလည်း အိပ်ယာလေးထဲမှာ အသက်ပျောက်နေရှာပြီ၊ မိုင်းသမားလေးက ပူဆွေးသောကရောက်ပြီး ငိုကြွေးမိပေမဲ့ ဘယ်သူ့ကို အပြစ်ဆိုရမှန်းလည်း မသိတော့ဘူးတဲ့၊ အိမ်နီးချင်းတွေကလည်း မသိချင်ယောင်ဆောင်နေကြတယ်၊ နောက်ဆုံး အဖွားရဲ့ ခေါင်းအုံးအောက်က ငှက်တောင်လေး ၃ တောင်ကိုတွေ့သတဲ့၊ အဖွားကိုသိပ်ချစ်တော့ အဖွား အမြတ်တနိုးသိမ်းထားတဲ့ ငှက်တောင်လေးတွေကို မိုင်းတူးသမားလေးက တယုတယကိုင်တွယ်ပြီး သူ့ရဲ့ ဦးထုပ်လေးထဲ ထိုးစိုက်ထားလိုက်တယ်၊ ပြီးတော့ အဖွားကို ကောင်းမွန်စွာ သဂြိုဟ်ရတာပေါ့၊ အစကတည်းက ဆင်းရဲလွန်းတဲ့မိုင်းသမားလေးခမြာ ခုဆို ဘာတစ်ခုမှကို မရှိတော့တဲ့ဘ၀မှာ သူ့ရဲ့ချစ်တဲ့သူလေးနဲ့ လက်ထပ်ရဖို့လည်းဝေးရပြီ ဆိုပြီး အဲ့ဒီအတွက်လည်း ၀မ်းနည်းနေခဲ့တယ်၊ ဒါပေမဲ့လည်း ရိုးသားကြိုးစားလိုတဲ့ လူငယ်လေးက နောက်တစ်နေ့မှာတော့ ပူဆွေးသောကတွေမေ့ဖျောက်ပြီး မနက်စောစောထ၊ အလုပ်သွားဖို့ ပြင်ရတော့တာပေါ့၊ အလုပ်ကိုပုံမှန်သွားခဲ့တယ်။

ဒီလိုနဲ့ ညနေအလုပ်ပြီးတော့ စိတ်ထွေထွေဖြစ်နေတဲ့ လူငယ်လေးက အမြဲသွားနေကျလမ်းကိုမှားပြီး လမ်းစပျောက် တောနက်ထဲ ရောက်သွားတယ်၊ ဖြစ်ချင်တော့ သူတို့ မိုင်းတွင်းနားမှာ စုန်းမလိုလို၊ နတ်သမီးတွေလိုလိုနေတဲ့ နေရာတစ်ခုရှိနေတယ်၊ ညမိုးချုပ်ပြီးဆို အဲဒီဘက်ကို ဘယ်သူမှမသွားရဲကြဘူး၊ မီးရောင်တွေတလက်လက်နဲ့ သရဲတစ္စေတွေမြူးကြတယ်ဆိုပဲ၊ ဒဏ္ဍာရီတစ်ခုလိုဖြစ်နေတာပေါ့၊ အခုတော့ မိုင်းတူးသမားလေးက လမ်းမှားရင်း အဲဒီနေရာဆီကို ဆိုက်ဆိုက်မြိုက်မြိုက်ကြီးရောက်သွားတာတဲ့၊ ရောက်လည်းရောက်တယ် ဆိုတာနဲ့ အင်မတန်မွှေးပျံ့သင်းကြိုင်ပြီး ချောမောလှပတဲ့ မိန်းမပျိုလေးက စွေ့ကနဲ၊ လူငယ်လေး အနားကို ဘယ်က ဘယ်လို ရောက်လာလိုက်မှန်းမသိ ရောက်လာတယ်၊ လူငယ်လေးကို ကြည့်ပြီး “ငါ .. မလှဘူးလားကွဲ့” လို့ မေးတယ်၊ လူငယ်လေးကလည်း မွန်မွန်ရည်ရည်ပြန်ဖြေရတာပေါ့၊ ကြောက်တာကိုး ဘာမှန်းမသိ၊ ညာမှန်းမသိနဲ့၊ “လှတာပေါ့ဗျာ၊ ခင်ဗျား .. အင်မတန်ချောမောလှပပါပေတယ်”  လို့ လူငယ်လေးကဖြေတယ်၊ မိန်းမပျိုလေးကထပ်မေးတယ်၊ “ကောင်လေးရေ .. ဒါဆို .. ငါ့ကို လက်ထပ်ပါလားကွဲ့၊ ငါ .. သိပ်လှတယ်ဆို၊ မင်း.. ကြိုက်ရဲ့မဟုတ်လား” လို့ တစ်ဆင့်တက်ပြီး မြူဆွယ်တယ်တဲ့၊ ကောင်လေးက ဖြေရပြန်တယ်၊  “အလိုဗျာ .. ခင်ဗျား လှတော့လှလွန်းပါရဲ့၊ ဒါပေမဲ့ ကျွန်တော်နဲ့ မအပ်စပ်ဘူး၊ ကျွန်တော့်မှာ အသက်လောက်ချစ်တဲ့ မိန်းကလေး၊ လက်ထပ်ချင်တဲ့ မိန်းကလေးရှိပြီးသားပါဗျာ၊ တစ်ခြားသူကို ရွေးချည်ပါ” လို့ လူငယ်လေးက တောင်းပန်တယ်၊ မိန်းမပျိုလေးက စိတ်နည်းနည်းဆိုးလာပြီ လှပချောမွေ့လှတဲ့ ရုပ်ကလေးကလည်း ခပ်ကြမ်းကြမ်းဖြစ်လာတယ်တဲ့၊ “ဒါဆို .. မင်း .. လူတိုင်းလူတိုင်းကြိုက်နှစ်သက်ကြတဲ့ အဖိုးတန် ကျောက်မျက်ရတနာတွေတော့ မင်း လိုချင်ရဲ့ မဟုတ်လား၊ ရော့ .. ယူပါကွဲ့ .. ယူပါကွဲ့” ဆိုပြီး တဖြတ်ဖြတ်လက်နေတဲ့ ကျောက်မျက်ရတနာတွေ မိုင်းသမားလေးရဲ့ ကုတ်အကျီအိပ်ကပ်တွေထဲ အတင်း ထိုးသိပ် ထည့်ပေးတယ်တဲ့၊ လူငယ်လေးက ခေါင်းခါခါ ခြေခါခါနဲ့ “မယူပါရစေနဲ့” လို့ အကြိမ်ကြိမ်ပြောရင်း ငြင်းတာပေါ့၊ နောက်တော့ ရတနာတွေ အိပ်ကပ်တွေထဲ အပြည့်အသိပ်ထည့်ပြီးရော လူငယ်လေးလည်း နေရာကမရွှေ့နိုင်၊ မပြေးနိုင်ဖြစ်တော့မှ .. “ကဲ .. ကောင်လေး .. လာခဲ့၊ ငါ့ကိုလည်း မယူ၊ ရတနာတွေလည်း မယူ၊ ငါကတော့ မင်း .. အသွေးအသား ယူရမှာပဲကွဲ့” ဆိုပြီး သူ့ပါးစပ်ကြီးဖြဲပြီး အစွယ်ကြီးနှစ်ချောင်းကို ထုတ်လိုက်တယ်၊ ချောချောလှလှ မိန်းမပျိုလေးကနေ ကြောက်စရာလန့်စရာ စုန်းမကြီးအသွင်ပြောင်းသွားပြီ၊ လူငယ်လေးကို ဂုတ်ချိုးပြီး သွေးစုတ်မယ်လည်းပြင်ရော၊ လူငယ်လေးဦးထုပ်က အဖွားရဲ့ငှက်တောင်လေးသုံးချောင်းက စုန်းမကြီးရဲ့ နှာခေါင်းထဲကို ထိုးထိုးထောင်ထောင်နဲ့ ကလိမိတာပေါ့၊ အဲဒီမှာ စုန်းမကြီးလည်း “ဟတ်ချိုး၊ ဟတ်ချိုး” အတောမသတ်နိုင်အောင်ချေရင်း “အလိုလေး ဘယ်နှယ်ဟာပါလိမ့်” လို့ အော်ဟစ်ပြီး ကြောက်လန့်တကြား ထွက်ပြေးတယ်တဲ့၊ စုန်းမကြီးထင်လိုက်တာက၊ လူငယ်လေးတော့ ငါ့ကို လက်နက်ဆန်းတစ်မျိုးနဲ့ ခုခံလိုက်ပြီလို့ ထင်သွားရှာတာကိုး၊ တစ်ချိုးတည်း ပြေးရော၊ ဒါပေမဲ့ လူငယ်လေးရဲ့ အိတ်ကပ်ထဲမတော့ အဖိုးတန်ရတနာတွေ ရှိတုန်းပဲ၊ ဒါနဲ့ လူငယ်လေးလည်း အဲဒီအတိုင်းပဲ အိမ်ကိုပြန်ပြေးခဲ့တယ်။

နောက်နေ့ မိုးလဲလင်းရော .. မိုင်းသမားလေးက သူ့ရဲ့ ချစ်သူကောင်မလေးကို ရတနာတွေပြပြီး ရောင်းချကြသတဲ့၊ လိုအပ်တဲ့ အသုံးအဆောင် ပစ္စည်းတွေ ၀ယ်ခြမ်းပြီး လက်ထပ်လိုက်ကြတယ်၊ ချက်ချင်း သူတို့ ချမ်းသာသွားကြတာကို မြင်တွေ့တော့ အိမ်နီးချင်းတစ်ယောက်က လာပြီး စပ်စုမေးမြန်းတယ်၊ “ဘယ်လိုနည်းနဲ့ ပိုက်ဆံတွေရလာသလဲ” လို့ အဲဒီလူက စပ်စုတယ်၊ လူငယ်လေးက ရှိုးသားတာကိုး၊ အမှန်ကို အမှန်အတိုင်းပဲပြောလိုက်ပါတယ်၊ ဒါနဲ့ အဲဒီ အိမ်နီးချင်းက ငါလည်းပဲ ရတနာရအောင်ကြံမယ် ဆိုတဲ့ ရည်ရွယ်ချက်နဲ့ လမ်း မပျောက် ပျောက်အောင်လုပ်၊ တမင်တကာကို အဲဒီစုန်းမကြီးရှိတဲ့နေရာ စွတ်တိုးသွားခဲ့တယ်၊ နောက်တော့ စုန်းမကြီးနေရာလည်းရောက်ရော .. မေးနေကျအတိုင်းမေးတာပဲတဲ့၊ လူငယ်လေးကပြောပြထားရဲ့နဲ့၊ အဲဒီအိမ်နီးချင်းက စုန်းမကြီးအလှမှာ ယစ်မူးပြီး “ငါ .. လှသလားကွဲ့” လို့ လဲ မေးရော “အိုး .. လှလိုက်တာမှ၊ တသက်နဲ့ တကိုယ်ဒီလိုချောမောလှပတာ မတွေ့ဖူးပါဘူး” လို့ ချွဲချွဲပြစ်ပြစ်ပြောလိုက်တာပေါ့၊ “ဒါဖြင့်ရင် .. ငါ့ ကို လက်ထပ်ခိုင်းရင် လက်ထပ်မယ်ပေါ့” လို့ စုန်းမကြီးက ထပ်မေးတယ်၊ အဲဒီလူက ချက်ခြင်းပဲ ဦးခေါင်းကျိုးမတတ် ခေါင်းကို သွက်သွက်ငြိမ့်ရင်း “လက်ထပ်ပါ့မယ်၊ လက်ထပ်ပါ့မယ်” လို့ အမောတကောဖြေတယ်တဲ့၊ “အဖိုးတန် ကျောက်သံပတ္တမြားတွေကော ယူချင်သေးလားကွဲ့” လို့ မေးလည်းမေးရော၊ သူအသင့်ယူလာတဲ့ အိပ်အကြီးကြီးတစ်လုံးကို ပေးပြီး “ယူချင်ပါရဲ့ဗျာ၊ ဟောဒီမှာ အိပ်အကြီးကြီးတောင် ယူလာပါရဲ့၊ အကောင်းဆုံးရတနာတွေသာ ရွေးပြီး ထည့်ချည်ပါ” လို့ ပြောပြီး အိတ်ကိုလှမ်းပေးတယ်တဲ့၊ စုန်းမကြီးလည်း ကျောက်သံပတ္တမြားတွေ အိတ်နဲ့ အပြည့်ထည့်ပေးတဲ့ အပြင်၊ သူ့ အကျီအိတ်ကပ်ထဲပါ ထည့်ပေးတော့တာကိုး၊ လောဘကြီးတဲ့ အိမ်နီးချင်းလည်း “ထည့်ပါ .. ထည့်ပါ၊ များများသာထည့်ပါ” ပြောနေရင်းနဲ့ပဲ၊ ရတနာတွေက လေးလံလွန်းတော့ လှုပ်လို့ မရတော့ဘူး၊ အဲဒီတော့မှ စုန်းမကြီးက အစွယ်ကြီးနှစ်ချောင်းနဲ့ အဲဒီလူရဲ့ လည်ပင်းကို ထိုးစိုက်ပြီး သွေးစုပ်တော့တယ်။

လောဘကြီးတဲ့သူများ ဒရက်ကူလာသွေးစုပ်တာခံရပြီး သေရှာတာပါပဲ၊ အခု ကျွန်မအသက်အရွယ်နဲ့ဆိုတော့ ငယ်ငယ်တုန်းကလို မကြောက်တတ်တော့တဲ့အပြင် နဲရှောပြောတဲ့ လောဘကြီးတဲ့ အိမ်နီးချင်းပုံစံက သိပ်ရယ်ရလွန်းတော့ ကျွန်မဖြင့် ရယ်လိုက်ရတာ၊ နဲရှောက ပိုဆိုးပါသေးတယ်၊ သူပဲပြော၊ သူက ဦးအောင်ရယ်နေခဲ့သေးတာ။

နောက်ထပ် .. “ပုတ်သင်ညှိ” ပုံပြင်ကလည်း စိတ်ဝင်စားစရာအကောင်းသား ...